Umaalingasaw na sa publiko ang sinasabing ma-anomalyang transaksyon na naganap sa pagitan ng gobyerno at ng ZTE Corporation. Lumalabas sa mga “bombang” pinasabog ni Joey de Venecia III, anak ni House Speaker Joe de Venecia, na isang korupsyon ang nangyaring bidding kung saan natalo ang kumpanyang Armsterdam Holdings Inc. na pag-aari ni Joey.

Sa mga inilabas na balita ng nakababatang de Venecia, nagkaroon ng pagtatangkang suhulan ni Comelec Chairman Benjamin Abalos etong si de Venecia sa halagang $10 milyon dolyares umurong lamang sa bidding! Sinabi rin ni Joey na dinuro siya ni First Gentleman Mike Arroyo nung sila ay nagkita. Pinabubulaanan naman eto ng kampo ni FG, ngunit tila ba nakakalimutan nila na napagkikita eto kasama ng napapabalitang nangongomisyong si Chairman Abalos sa golf practices at napabalita pa ang pagpunta ng Presidente Arroyo sa China upang dumalo sa pirmahan ng kontrata ng ZTE Corporations.

Ano ba ang nasa likod ng National Broadband Network project na ito at tila ba lahat ng politiko ngayon ay nakatuon ang pansin sa isyu? Malaking dagok ito sa administrasyon sapagkat ang anak mismo ng House Speaker – na kilalang maka-administrasyon, ang siyang nag-aakusa ngayon sa isang miyembro ng pamilyang Arroyo kaugnay ng anomalyang kinasasangkutan ng mga ito.

Nakapagsalita tuloy ang kaisa-isang anak na babae ng presidente at tila ba eto ay isang personal na pag-atake sa katauhan ni Joey de Venecia. Mula sa Willie vs. Joey dL, ngayon naman ay Luli vs. Joey dV!

Iginigiit naman ng abogado ng First Gentleman na malawak masyado ang pag-iisip ng batang de Venecia at tila ba ang ipinapahiwatig nito ay gumagawa lamang ito ng  isang kathang-isip na alegasyon. Handa raw namang humarap sa senado si FG, na sa ngayon ay nasa bakasyon sa Hongkong, sakaling ito ay ipatawag ano mang araw at oras.

Isa sa mga inaakusahan naman na “bata” ni Joey na si Congressman Carlos Padilla ay nagsabi sa programang PALABAN (GMA 7, Huwebes ng madaling araw) na mahirap sabihing nagsisinungaling ang may-ari ng AHI dahil mahirap magparatang lalong-lalo na kung ang pinaparatangan ay mga taong malalapit sa “panginoon.” Mayroon diumanong sapat na ebidensya ang kampo ni de Venecia at may mga tetestigo rin na magpapatunay na nagkaroon nga ng anomalya dito.

Una ng kumalat ang balita noong pang Marso, taong kasalukuyan, noong nakatanggap ng sulat etong si Jarius Bondoc, isang manunulat para sa Philippine Star. Ang sulat na natanggap ng kaniyang programa sa Radyo, DWIZ, ay naglalaman ng mga isyu na nakalap sa pagitan ng bidding. Nag-imbestiga naman si ginoong Bondoc, at sa kaniyang mga nakalap na detalye sa industriya ng telekomunikasyon, napag-alaman na usap-usapan na nga eto sa mga sulok ng opisina ng mga telcos na may nangyari ngang katiwalian sa NBN deal.

Dahil sa mga pangyayari, biglaang nagpatawag ng miting si Presidente Arroyo kagabi sa Malakanyang. Isa si DOTC Secretary Leandro Mendoza sa mga ipinatawag. Halata rin naming nahahati ngayon ang senado at kongreso sa kung sino ang kanilang pinapanigan.

Importante nga naman ang Broadband Network para sa bansa, ngunit masyado raw malaki ang naging bayaran sa pagitan ng gobyerno at ng kumpanyang pag-aari ng mga Tsino na umabot sa higit sa $200 milyong dolyar. 

Hindi na nga natin pinag-usapan dito ang nakaraang paghatol sa dating Pangulong Joseph Estrada, dahil ayaw po natin na maging karnabal pa ang naturang isyu. Ngunit etong ZTE Broadband deal ay isang isyung hindi dapat palagpasin at dapat lamang isa-publiko dahil ito ay isang malawak at malaking anomalya na lubhang makakaapekto sa gobyerno at sa ating mamamayan.

Humihingi ng eksplanasyon ang masa sa pangyayaring ito. Isa nga ba etong conspiracy at isang malawakang corruption? Hindi dapat itikom ang bibig ng mga taong nagnanais at naghahanap ng katotohanan.

Ano ang nasa likod ng pangyayaring eto? Mayroon nga bang nakinabang? Sino ang tunay na nagwagi dito? Isa lamang ba etong ganti ng natalong bidder?

Ano man ang nasa likod nito, kailangan ang masusing imbestigasyon. Hindi sana magamit ang mga pwesto ng mga taong nasasangkot upang maging malinis ang pag-imbestiga dito.

Pare-parehong malalaking tao ang mga sangkot sa anomalyang eto. Sana sa bandang huli, katotohanan lamang ang lumabas at huwag sanang mangyari na mauwi lamang ito sa wala. Wala sanang aregluhang mangyari dito kung meron nga at mapatunayang may anomalyang naganap. Sabagay, hindi lang sandaan libong piso ang pinag-uusapan dito, kundi milyong dolyar. Huwag lang sanang papasilaw ang mga nag-aakusa upang ang katotohanan ay lumabas.

Para naman sa kampo ni Joey de Venecia, kung may sapat kayong ebidensiya, ilabas niyo na upang hindi na mabitin ang mga taong naghahanap ng sagot sa isyu. Kung eto naman ay paninirang-puri lamang at pawang kasinungalingan, marapat lamang na mabigyan eto ng sapat na forum at imbestigasyon upang mapatunayan ang inyong pag-aakusa. Kung mapatunayang walang merito ang inyong akusasyon, dapat ay malaman din yan ng taong-bayan.

Katotohanan lang ang nais ng bayan!

See related story Chairman Abalos Nagbitiw!

October 25, 2007 UPDATES!!!

Inisnab ng ilang opisyal ng pamahalaan at pati na ni First Gentleman Mike Arroyo ang Senate Hearing ngayong umaga kaugnay ng ZTE Broadband Deal investigation. Hinikayat ng mga doktor ang First Gentleman na huwag munang dumalo sa mga lugar o pagtitipon na maaaring makasam sa kaniyang kalusaugan at magdulot ng karagdagang stress.

Samantala, dumalo naman ang ZTE whistleblower na si Joey de Venecia III at ang pagdinig ay may kaugnayan na rin sa Assassination Plot na isiniwalat ni Joey na pagtangka sa kaniyang buhay.

Pianratangan naman ni Transportation and Communications Secretary Leandro Mendoza na isa lamang “fairy tale” ang di-umanong assassination attempt na ibinunyag ni Joey de Venecia na kung saan ay idinawit din ang pangalan nila Transporataion and Communications Assistant Secretary Reynaldo Berroya at Bureau of Corrections director Ricardo Dapat na magkasamang nag-plano ng “slay-plot” attempt.

NOVEMBER 03, 2007 UPDATES!!!

Sa pagsapit ng Araw Ng Mga Kaluluwa ay tila ba multo na pilit na kinakatakutan ang mga imbestigasyon sa Hello Garci tapes, Malacanang bribery, Jose Pidal Expose, Fertilizer Scam, Diosdado Macapagal Scam, Northrail Scam, ZTE Broadband deal, at marami pang iba. Mayroon bang dapat ikatakot dito? Nagtatanong lang po…

JANUARY 08, 2008 UPDATES!!!

Salamat sa mga sumubaybay ng SCAM na ito at marami rin natulungan ang artikulo na ito sa mga estudyanteng gumagawa ng kani-kanilang proyekto. Thank you po at nakakatulong tayo!

Pero ano na ba talaga ang nangyari mga kuya?! Ha?! Mukhang tahimik na ang usapin dito ah! Kaya madami pa rin ang gumagawa ng mga kilos-protesta dahil na rin sa mga pangyayari sa pamunuan ng bansa. Andami pa ring anomalya pero mukhang nababalewala lang. Hmmm….Hello Garci?

Hay Naku! Ang Pinoy talaga! Bagong taon na, sana po ay magbago na rin ang ihip ng hangin para sa bayan natin! Agree?

Happy New Year to all!!!!

---

Possibly related posts: (automatically generated)

• Bonifacio Eve
• Sana Nga
• ZTE Scandal Unleashed Once More!
• Alamat ng Gubat: Kwentong Pambata na Pang-matanda